Բլեֆարոպլաստիկա. drtehmine.com

Բլեֆարոպլաստիկան վիրաբուժական միջամտություն է, որի ժամանակ իրականացվում է կոպերի մաշկի ձգում: Շատերի համար այն կոպերի այտուցից և ճողվածքից ազատվելու միակ արդյունավետ եղանակն է:

Երբ դիմել բլեֆարոպլաստիկայի

Աչքերը մատնում են իրական տարիքը, այդ պատճառով վիրահատական շտկումը հնարավորություն է տալիս զգալիորեն բարելավել արտաքին տեսքը:
Հիմնականում այս միջոցառումը պահանջված է միջին տարիքի պացիենտների մոտ: Առաջին տարիքային նշանները աչքերի տակ առաջացած կնճիռներն ու պարկերն են, որոնց պատճառով մարդիկ ավելի տարեց են երևում: Երբեմն այս միջամտությունը  պահանջվում է, նույնիսկ, ավելի երիտասարդ տարիքում, եթե կա կոպերի կախվածության և ճողվածքների առաջացման անատոմիական նախատրամադրվածություն:

Բլեֆարոպլաստիկայի իրականացման ցուցումներն են.

• պտոզը և աչքերի տակ պարկերի առկայությունը,
• մանր և խորը կնճիռները,
• ծերացման հետևանքով կոպերի իջեցման արդյունքում` ծանրության զգացում` կոպերում, տեսադաշտի նվազում,
• հոգնած տեսքը,
• կոպերի թերությունները շտկելու ցանկությունը,
• աչքերի կտրվածքը կամ ձևը փոխելու ցանկությունը,
• աչքերի անկյունների իջեցումը:

Բլեֆարոպլաստիկա իրականացնելու որոշում կայացնելիս հարկ է հաշվի առնել, որ որքան ուշ իրականացվի շտկումը, այնքան նկատելի կլինեն սպիները: Եթե կան ճարպային ճողվածքներ, բայց մաշկը դեռ էլաստիկ է, վիրահատությունը որևէ հետք չի թողնի:  Թե քանի անգամ կարելի է բլեֆարոպլաստիկա իրականացնել, որոշում է մասնագետը:   Հարկ է նշել, որ վիրահատությունների միջև ժամանակը պետք է լինի առնվազն յոթ տարի:

Կոպերի ավելորդ մաշկային ծալքերի առաջացման պատճառներըՃողվածքներ կարող են առաջանալ վերին և ստորին կոպերի վրա: Պատճառը աչքերի շուրջ մկանների թուլացումը և հյուսվածքների էլաստիկության նվազումն է: Փաստորեն, դա կոպերի որոշակի մասերում ճարպաբջջանքի այտուցն է՝ տարիքային փոփոխություններով պայմանավորված։ Այս հարցում նշանակություն ունի նաև ժառանգականությունը և վնասակար սովորությունների առկայությունը։

Շտկման եղանակները
Կոպերի մաշկը կարելի է ձգել պլաստիկ վիրահատությամբ և ոչ վիրահատական ճանապարհով։ Յուրաքանչյուր դեպքում շտկման եղանակը ընտրվում է անհատապես՝ պայմանավորված օրգանիզմի ընդհանուր առողջական և աչքերի շուրջը մաշկի վիճակով։  

Ոչ վիրահատական բլեֆարոպլաստիկա
Համարվում է շտկման առավել անցավ և ոչ տրավմատիկ եղանակ։ Բացի այդ, այն ունի նվազագույն հակացուցումներ և հնարավոր բարդություններ։

Կիրառվում է երկու մեթոդ.

• Ներարկումային. մաշկի տակ ներարկում են պատրաստուկներ, որոնք այն ավելի հարթ և էլաստիկ են դարձնում։
• Գործիքային. ներառում է լազերային, ուլտրաձայնային, տերմաժ, ջերմալիֆտինգային, էլեկտրա-, Raylife և DROT-թերապիա։

Հակացուցումները.

• հղիություն,
• չարորակ նորագոյացություն,
• սրտի ռիթմը վարող սարքի առկայություն,
• վարակիչ և աուտոիմուն հիվանդություններ,
• հեմոֆիլիա,
• աչքերի շուրջ մաշկի բորբոքային հիվանդություններ (գարիկ),
• շաքարային դիաբետ։

Վերին և ստորին կոպերի ոչ վիրահատական բլեֆարոպլաստիկայից հետո սպիներ չեն մնում։ Արդյունքը պահպանվում է մեկից (ներարկումներ) մինչև յոթ տարի (լազերային պրոցեդուրաներ)։

Սակայն ոչ վիրահատական եղանակը վերացնում է միայն մանր խնդիրները՝ ոչ խորը կնճիռները, ճարպի ոչ մեծ կուտակումները։
Եթե խնդիրը լուրջ է և պացիենտը 50-ն անց է, նպատակահարմար է պլաստիկ վիրահատությունը։

Պլաստիկ վիրահատություն
Ավելորդ ճարպային հյուսվածքները և մաշկը հեռացվում են վիրահատական ճանապարհով։  Կտրվածքներն իրականացվում են մաշկի բնական ծալքերում, որպեսզի սպիները չնկատվեն։ Ստորին կոպի շրջանում ճողվածքների հեռացումը հնարավոր է աչքի լորձաթաղանթի միջոցով, այսինքն՝ առանց կտրվածքների։

Հակացուցումները.

• արյան մակարդելիության խնդիրներ,
• հակամակարդիչների ընդունում,
• տարած ինֆարկտ կամ կաթված,
• ցանցենու շերտազատում,
• սրտի աշխատանքի հետ կապված խնդիրներ,
• շաքարային դիաբետ,
• ուռուցքներ,
• ՁԻԱՀ,
• համակարգային հիվանդություններ,
• երիկամների կամ լյարդի քրոնիկական անբավարարություն,
• դաշտան,
• հղիության և կրծքով կերակրման շրջան:

Հետևյալ ոչ սպեցիֆիկ գործոնների դեպքում ևս չի կարելի վիրահատություն իրականացնել.

• կոպերի շուրջ մաշկի բորբոքում,Բազեդովյան հիվանդություն,
• չոր աչքերի համախտանիշ,
• քունքի շրջանում խոր սպիներ,
• կարճատեսություն,
• կոնյուկտիվիտ,
• բլեֆարոսպազմ կամ գլաուկոմա:

Հետվիրահատական վերականգնողական շրջան
Բլեֆարոպլաստիկայից հետո կարերը չեն հեռացվում, քանի որ կիրառվում են հատուկ ներծծվող թելեր:   
Վիրահատությունից հետո առաջին օրերին դիտվում են այտուցներ. դա օրգանիզմի բնական ռեակցիան է: Այտուցվածությունը կարելի է նվազեցնել սառը կոմպրեսների միջոցով:  

Բլեֆարոպլաստիկայից հետո արագ վերականգնվելու համար պացիենտները պետք է հետևեն նաև որոշ կանոնների.

• բացառել աչքերի և կոպերի ծանրաբեռնվածությունը (ընթերցանություն, համակարգիչ, հեռուստացույց, կոնտակտային ոսպնյակներ, պայծառ լույս),
• հրաժարվել ծխախոտից և ալկոհոլից (այտուցներից խուսափելու համար), աղի սննդից,
• քնել մեջքի վրա՝ բարձր բարձով,
• մեկ ամսով կոնտակտային ոսպնյակները փոխարինել ակնոցներով,
• հնարավորին խուսափել գլխի թեքումներից,
• կոպերը և աչքերը պաշտպանել արտաքին ազդակներից (քամի, պայծառ լույս, կոսմետիկա, օճառ),
• դեմքը լվանալ երիցուկի եփուկով,
• խուսափել բաղնիքից և սաունայից,
• կատարել աչքերի համար նախատեսված հատուկ վարժություններ:

Վերականգնողական շրջանը տևում է 7-10 օր: Աշխատանքի կարելի է գնալ 2 շաբաթ անց: Արդյունքը նկատելի կլինի վիրահատությունից անմիջապես հետո, սակայն վերջնական արդյունքն ակնհայտ կլինի միայն մեկ ամիս անց: Կոպերի մաշկի խնամքի կանոններին հետևելը հնարավորություն կտա արդյունքը պահպանել հնարավորին երկար, երբեմն այդ շրջանը տևում է ավելի քան տաս տարի:   

Ե՞րբ իրականացնել բլեֆարոպլաստիկա. մասնագետների կարծիքը
Պլաստիկ վիրաբույժները խորհուրդ են տալիս առաջին միջոցառումն իրականացնել դեռևս 35-40 տարեկանում: Այս տարիքում արդեն սկսվում է ծերացման գործընթացը, և ժամանակին իրականացված վիրահատությունը հնարավորություն կտա խուսափել սպիներից. սպիները մաշկի վրա մնում են գրեթե աննկատ:   

Քանի որ բլեֆարոպլաստիկան ծերացումը դադարեցնում է ժամանակավորապես, կարիք է լինում կրկնել վիրահատությունը: Լավագույն տարիքը 50-ն է, ապա` 65 տարեկանը: Կարևոր է խնդրին պատասխանատվությամբ մոտենալ և լավ մասնագետ ընտրել:

Հարցեր, պատասխաններ, մեկնաբանություններ